अमेरिकी पर्यटकलाई लक्षित गर्दै न्यूयोर्कमा नेपालको पर्यटन प्रवर्द्धन कार्यक्रम

नेपाल पर्यटन बोर्ड, न्यूयोर्कस्थित नेपाली महावाणिज्य दूतावास र प्यासिफिक एसिया ट्राभल एशोसिएसन (PATA) को संयुक्त आयोजनामा अमेरिका, विशेषतः न्यूयोर्क सहरमा नेपालको पर्यटन प्रवर्द्धन गर्ने उद्देश्यले एक भव्य कार्यक्रम सम्पन्न भएको छ।

उक्त कार्यक्रममा न्यूयोर्कका करिब ५० जना अग्रणी ट्राभल एजेन्सी, टुर अपरेटर, पत्रकार तथा पर्यटन व्यवसायीहरूको उपस्थिति रहेको थियो। उनीहरूलाई नेपालमा भ्रमणका अवसर, नयाँ गन्तव्यहरू, सांस्कृतिक सम्पदा, साहसिक खेलकुद, हिमाली पर्यटन, तथा सामुदायिक होमस्टे जस्ता नवीन विषयमा जानकारी दिइएको थियो।

कार्यक्रममा प्रमुख अतिथिको रूपमा रहेका महावाणिज्यदूत दधिराम भण्डारीले नेपालको पर्यटन क्षेत्र अमेरिकी पर्यटकका लागि अत्यन्त आकर्षक र सुरक्षित गन्तव्य रहेको बताउँदै नेपाल सरकारले हालै ल्याएका पर्यटन अनुकूल नीतिहरूबारे जानकारी गराए।

संयुक्त राष्ट्रसंघका लागि नेपाली स्थायी प्रतिनिधि लोकबहादुर थापाले सम्बोधन गर्दै पर्यटनमार्फत सामाजिक र आर्थिक समृद्धिमा टेवा पु¥याउने खालका समावेशी र दिगो प्रवर्द्धनमा जोड दिनुपर्ने आवश्यकता औंल्याए।

कार्यक्रममा अमेरिकन लेखक एरिन लेभी ले नेपालको भ्रमण अनुभव साझा गर्दै नेपाल सबै उमेर समूहका पर्यटकका लागि सुरक्षित, रमाइलो र सांस्कृतिक रूपमा समृद्ध मुलुक रहेको धारणा राखिन्। यस्तै, चियापट्टी व्यवसायी निश्चल बान्सकोटा ले 'इमर्सिभ टी टुरिज्म' को अवधारणा प्रस्तुत गर्दै अमेरिकाबाट पर्यटकहरूलाई पूर्वी नेपालको चिया बगान घुमाउने नयाँ अभियानको बारेमा जानकारी गराए।

कार्यक्रममा सहभागिहरूलाई नेपाली परिकार, सांस्कृतिक भेषभूषा, तथा आतिथ्यता अनुभव गराइयो जसले नेपालको पहिचान र आत्मीयतालाई प्रत्यक्ष रूपमा महसुस गराउने कार्य गर्‍यो। PATA न्यूयोर्ककी कार्यकारी निर्देशक एलिजाबेथ चिन ले नेपालसँग ट्राभल व्यवसायीहरूले सहकार्य विस्तार गर्न प्रेरणा लिने बताइन्।

यस कार्यक्रममार्फत नेपालले अमेरिकी बजारमा आफ्नो पर्यटन सम्भावनालाई बलियो रूपमा प्रस्तुत गर्नुका साथै नेपाली गन्तव्यहरूलाई दिगो, समावेशी र अन्तर्राष्ट्रियस्तरमै प्रतिस्पर्धी बनाउने प्रयास गरेको देखिएको छ।