यूएनएससीमा रुसविरुद्ध वक्तव्यमा अमेरिका अनुपस्थित

संयुक्त राष्ट्र सुरक्षा परिषद् (यूएनएससी) मा गएको १७ वर्षपछि पहिलोपटक अमेरिकाले रुसलाई जर्जियासँगको द्वन्द्वसम्बन्धी संयुक्त वक्तव्यमार्फत निन्दा गरेन। परम्परागत रूपमा हरेक वर्ष अमेरिका यस्ता वक्तव्यमा सहभागी हुँदै आएको भए पनि यसपटक भने उसले आफ्नो समर्थन जनाएन।

अगस्ट २१ मा सम्पन्न बन्द बैठकपछि जारी गरिएको संयुक्त वक्तव्यमा बेलायत, फ्रान्स, स्लोभेनिया, डेनमार्क, ग्रीस र लाट्भिया सम्मिलित थिए। उक्त वक्तव्यमा सन् २००८ मा जर्जियामाथि गरिएको रुसको “क्रूर आक्रमण” को निन्दा गर्दै, हालसम्म दक्षिण ओसेटिया र अब्खाजिया क्षेत्रमा जारी रहेको रुसी सैन्य उपस्थितिप्रति कडा आपत्ति जनाइएको छ। साथै, रुसले तत्कालै २००८ को युद्धविराम सम्झौताको पूर्ण कार्यान्वयन गर्नुपर्ने, आफ्नो सेना फिर्ता बोलाउनुपर्ने र ती दुई क्षेत्रलाई दिएको मान्यता फिर्ता लिनुपर्ने माग गरिएको छ।

वक्तव्यमा जर्जियाको सार्वभौमिकता र भौगोलिक अखण्डता प्रति दृढ समर्थन पुनः प्रष्ट पारिएको छ। साथै, ती क्षेत्रमा मानवअधिकार र मानवीय पहुँच सुनिश्चित गर्न रुसलाई आग्रह गरिएको छ।

तर, यसपटक अमेरिकाले उक्त वक्तव्यमा हस्ताक्षर नगरेको विषयलाई निकै महत्त्वपूर्ण मानिएको छ। सन् २००८ पछि पहिलोपटक यस्तो भएको हो। विश्लेषकहरूले यसलाई अमेरिकाको पछिल्लो कूटनीतिक रणनीतिसँग जोडेर व्याख्या गरेका छन्। यसअघि पनि अमेरिका युक्रेनसम्बन्धी केही संयुक्त राष्ट्र प्रस्तावमा रुसलाई प्रत्यक्ष “आक्रमणकारी” भन्नुभन्दा बढी तटस्थ भाषा प्रयोग गरेको पाइन्छ।

यस कदमलाई अमेरिकाले रुससँग सम्बन्धित मुद्दामा आफ्नो नरम कूटनीतिक धारणा देखाएको संकेतका रूपमा व्याख्या गरिएको छ।