गृहमन्त्री लेखकको राजीनामा

सामाजिक सञ्जाल प्रतिबन्धविरुद्ध सुरु भएको Gen Z आन्दोलनले हिंसात्मक रूप लिएपछि बढ्दो दवावका बीच गृहमन्त्री रवि लेखकले पदबाट राजीनामा दिएका छन्। काठमाडौंसहित देशभर भइरहेका प्रदर्शनमा १३ जनाको मृत्यु र सयौं घाइते भएपछि मन्त्री लेखकलाई आलोचनाको ठूलो चपेटामा पारिएको थियो।

लेखकले सोमबार साँझ प्रधानमन्त्रीलाई राजीनामा बुझाएका छन्। उनले आन्दोलनमा भएको जनहानिप्रति गहिरो दुःख व्यक्त गर्दै आफ्नो राजनीतिक र नैतिक जिम्मेवारी स्वीकार गर्दै राजीनामा दिएको बताइएको छ। मन्त्री पदबाट हटे पनि आफू लोकतन्त्र, अभिव्यक्ति स्वतन्त्रता र शान्तिपूर्ण समाधानका पक्षमा सदैव उभिने प्रतिबद्धता उनले जाहेर गरेका छन्।

यसअघि आन्दोलन नियन्त्रणका क्रममा सुरक्षाकर्मीहरूले अत्यधिक बल प्रयोग गरेको भन्दै सरकारमाथि चर्को आलोचना भएको थियो। विद्यार्थी, पत्रकार र साधारण नागरिकमाथि भएको दमनले आम जनमानसमा आक्रोश फैलिएको थियो।

गृहमन्त्री लेखकको राजीनामासँगै सरकारले आन्दोलन शान्त पार्नका लागि संवादको पहल गर्ने तयारी गरिरहेको बताइएको छ। तर, सडकमा उत्रिएका युवाहरूले भने प्रतिबन्ध फिर्ता नभएसम्म आन्दोलन जारी रहने चेतावनी दिएका छन्।