स्थानीय सरकारलाई सशक्त बनाउँदै DRR जिम्मेवारी हस्तान्तरण

काठमाडौँ — गृह मन्त्री रमेश लेखकले विपद् जोखिम न्यूनीकरण र व्यवस्थापनलाई स्थानीय तहको नेतृत्वमा सशक्त बनाउनुपर्नेमा जोड दिएका छन्। सोमबार सुर्खेतको वीरेन्द्रनगरमा आयोजित प्रादेशिक आपतकालीन गोदाम हस्तान्तरण कार्यक्रममा उनले संघीय संरचनाअनुसार विपद् व्यवस्थापनको प्रमुख भूमिका स्थानीय सरकारसँग जोडिनुपर्ने बताएका हुन्।

उनका अनुसार अब कुनै पनि विपद्को समयमा प्रदेश सरकार र स्थानीय तहले तत्काल राहत तथा उद्धार कार्य सञ्चालन गर्न सक्नेछन्। यसअघि जस्तै केन्द्र वा राष्ट्रिय निकायबाट अनुमति लिनुपर्ने बाध्यता हट्दै गएको उनले स्पष्ट पारे। “विपद् व्यवस्थापनको प्रभावकारी कामको लागि सर्वसाधारणसँग नजिक रहेको तहलाई सशक्त बनाउनै पर्छ,” मन्त्री लेखकले भने।

गृह मन्त्रालयका अनुसार सातै प्रदेशमा आपतकालीन गोदाम निर्माण भइसकेको छ र यसलाई आगामी दिनमा स्थानीय तहसम्म विस्तार गर्ने तयारी भइरहेको छ। मन्त्री लेखकले यसलाई दीगो समाधानका लागि ठूलो कदमका रूपमा व्याख्या गर्दै राष्ट्रिय परिषद् र विपद् जोखिम न्यूनीकरण प्राधिकरणसँग समेत समन्वय गरेर अघि बढाइने जानकारी दिए।

कार्यक्रममा करनाली प्रदेशका मुख्यमन्त्री यमलाल कँडेलले गोदाम मात्र हस्तान्तरण गरेर काम पूरा नहुने उल्लेख गर्दै यससँग सम्बन्धित बजेट र अधिकार पनि प्रदेश सरकारलाई हस्तान्तरण गर्नुपर्नेमा जोड दिए। उनले यो प्रक्रिया सात वर्षअघि नै सम्पन्न भइसकेको हुनुपर्ने उल्लेख गर्दै संघीयता कार्यान्वयनलाई अझ व्यवहारिक बनाउन आग्रह गरे।