तेल अविवमा विपिन जोशीकी दिदीको हृदयविदारक आग्रह

करिब दुई वर्षदेखि हराइरहेका नेपाली विद्यार्थी विपिन जोशीको परिवारले उनलाई सुरक्षित फर्काउन अन्तर्राष्ट्रिय समुदायसँग भावुक अपील गरेका छन्। होस्टेज स्क्वायर मा हजारौँको भीडलाई सम्बोधन गर्दै विपिनकी दिदी पुष्पा जोशीले भनिन्, “६८० दिनभन्दा बढी अँध्यारो र असह्य कोठामा कसरी बस्न सकिन्छ? दुई वर्षदेखि हाम्रो परिवारले छोराविहीन जीवन बिताइरहेका छौँ, र म दाजाविनाको पीडामा बाँचेकी छु।”

उनले आफ्ना दाजु प्रत्यक्ष सम्बोधन गर्दै आँसु भरिएर भनिन्, “दाइ, तपाईंलाई म शब्दले भन्दा बढी सम्झन्छु। तपाईंको अँगालो, तपाईंको स्वर, तपाईंको उपस्थिति—सबै कुरा मैले धेरै मिस गरिरहेकी छु।”

यसअघि, पुष्पा जोशी र आमाले यरुशलेममा राष्ट्रपति इसाक हर्जोगसँग भेट गरेका थिए। सो अवसरमा राष्ट्रपति हर्जोगले विपिनलाई फर्काउन इस्रायलले सक्दो प्रयास गर्ने आश्वासन दिएका थिए। कार्यक्रममा बोल्दै पुष्पाले भनिन्, “म सबै इस्रायली जनतालाई हृदयदेखि धन्यवाद दिन चाहन्छु। तपाईंहरूको समर्थनले हामीलाई आशा दिएको छ। तर अब विश्व समुदायसँग मेरो अपील छ—कृपया विपिनलाई फर्काउन सक्ने सबै प्रयास गर्नुहोस्।”

इस्रायली सञ्चारमाध्यमहरूसँग कुरा गर्दै उनले थपिन्, “मेरा दाइ कुनै पक्षमा छैनन्, उनी केवल एक विद्यार्थी हुन्, जसलाई युद्धले अनाहकमा बन्धक बनाएको छ। लगभग दुई वर्ष बितिसक्यो, हामीलाई उनको जीवनबारे कुनै खबर छैन। के उनी घाइते छन्? के उनी भोकै छन्? वा अझै जीवितै छन्?”

पुष्पाले विशेषगरी अमेरिकासहित अन्तर्राष्ट्रिय शक्तिहरूलाई आग्रह गरिन् कि सबै बन्धकहरूको सुरक्षित मुक्तिका लागि तत्काल ठोस कदम चालियोस्। उनले भनिन्, “हामी विश्व नेताहरूसँग बिन्ती गर्दछौँ—अब ढिला नगरी सबैलाई घर फर्काइदिनुहोस्।”