नेपालको खोप अभियान सफल, रुबेला रोग उन्मूलन-WHO

नेपालले सार्वजनिक स्वास्थ्य क्षेत्रमा ठूलो उपलब्धि हासिल गरेको छ। विश्व स्वास्थ्य संगठन (WHO) ले नेपाललाई रुबेला रोगको उन्मूलन गर्न सफल भएको औपचारिक घोषणा गरेको हो। रुबेला एक संक्रामक भाइरस जन्य रोग हो जसले विशेषगरी गर्भवती महिलालाई असर गरी जन्मजात विकृतिहरू निम्त्याउने खतरा हुन्छ।

नेपाल सरकारले विगत केही दशकदेखि खोप अभियानलाई प्राथमिकतामा राख्दै आएको थियो। विशेषगरी बालबालिकालाई लक्षित गरी नियमित खोप कार्यक्रम र राष्ट्रिय खोप अभियानमार्फत रुबेला नियन्त्रणका लागि निरन्तर प्रयास गरिएको थियो। स्वास्थ्यकर्मी, स्थानीय सरकार र समुदायको सक्रियताले यो सफलता सम्भव भएको हो।

डब्ल्यूएचओले गरेको मूल्याङ्कनमा नेपालमा पछिल्ला वर्षहरूमा रुबेला संक्रमणको कुनै पनि सामुदायिक प्रकोप देखिएको छैन। यसले देशलाई रुबेला उन्मूलनको सूचिमा प्रवेश गराएको छ। यो उपलब्धिले नेपाललाई स्वास्थ्य क्षेत्रमा अर्को महत्वपूर्ण चरणमा पुर्‍याएको छ।

स्वास्थ्य तथा जनसंख्या मन्त्रालयका अधिकारीहरूले यसलाई "जनस्वास्थ्यमा ठूलो उपलब्धि" भनेका छन्। उनीहरूले निरन्तर खोप अभियानलाई अझ मजबुत बनाउँदै रोग पुनः देखा नपर्ने वातावरण बनाउन प्रतिबद्धता जनाएका छन्।